facebook

 

 twitter

 

 youtube

 

 linkedin

   
Mércores, 24-Abril-2019
Español (spanish formal Internacional)Galician (Galego)English (United Kingdom)
Mapa web
A Autoridade Portuaria e AJE Pontevedra convocan o II Premio Ría de Arousa para fomentar o emprendemento
Luns, 14 Maio 2018 14:38
AddThis Social Bookmark Button

presentacin premio aje 140518O Espazo Emprendedor gestionado pola Asociación de Jövenes Empresarios de Pontevedra no porto de Vilagarcía acolleu esta mañá o acto de presentación do II Premio Ría de Arousa organizado por AJE Pontevedra e a Autoridade Portuaria de Vilagarcía.

O obxectivo desta iniciativa é fomentar o emprendemento no ámbito marítimo-portuario e logístico, poñendo en valor a ría con ideas innovadoras e viables. A presentación contou coas intervencións da presidenta da Autoridade Portuaria, Sagrario Franco; o presidente da asociación de Jóvenes Empresarios de Pontevedra, Pablo Fernández, e José Luis Vilanova, en representación de FECA. Asistiron tamén representantes das entidades colaboradoras: Xunta de Galicia (a través do IGAPE e da Consellería do Mar), Banco Santander, Galicia Business School e grupo J. Rey asesores.

O presidente de AJE Pontevedra, Pablo Fernández, agradeceu a implicación da Autoridade Portuaria e das entidades colaboradoras con esta iniciativa, e destacou na súa intervención a importante dotación económica do premio, que ascende globalmente a 12.000 euros. Ao premio poden presentarse tanto persoas físicas como empresas, sempre que estas leven constituídas menos dun ano. Valoraranse ideas innovadoras e viables, que estean relacionadas coa economía marítimo portuaria ou a loxística, e que poñan en valor a Ría de Arousa. Para máis información, pode consultarse a web www.ajepontevedra.es/ii-premio-ria-de-arousa/.

O primeiro premio desta convocatoria está dotado con 2.000 euros para gastos de constitución da empresa, e o programa formativo “Diploma en Business Administration” valorado en 3.600 euros, ademais dun despacho no Espazo Emprendedor, que o ganador poderá utilizar durante un ano. Prevense ademais tres accésits, que serán recoñecidos cun” Programa Superior en Liderado e Dirección de Equipos” valorado en 1.800 euros, máis utilización durante seis meses a zona coworking do Espazo Emprendedor.

O presidente da Federación de Empresarios da Comarca de Arousa, José Luís Vilanova, apuntou que este ano, como novidade con respecto á primeira edición celebrada en 2016, outorgarase tamén un premio honorífico “a unha empresa do sector con bagaxe e recoñecido prestixio”, para visibilizar tamén o labor de compañías veteranas.

Pola súa banda a presidenta da Autoridade Portuaria destacou na súa intervención que “as Autoridades Portuarias son organismos en continua adaptación, xa que o noso obxectivo é atender do xeito máis eficiente as necesidades dos sectores loxístico e produtivo da nosa área de influencia, e iso non é posible desde a rixidez ou o inmovilismo. Por iso, debemos ser non só intermediarios na loxística das empresas, senón tamén axentes activos, actuando como dinamizadores da comunidade loxístico-portuaria e marítima”.

Nesta liña de actuación enmárcase o premio Ría de Arousa, que entronca ademais coa misión da Autoridade Portuaria como axente de desenvolvemento económico e social e exemplo de colaboración público e privada, co fin último de contribuír á dinamización, desenvolvemento e pulo da súa contorna, “pois a nosa actividade -engadiu Franco Malvar- non tería sentido si non é para favorecer o progreso económico, pero tamén social, da nosa área de influencia”. “Esperamos que desta convocatoria -concluíu Sagrario Franco- xurdan ideas excelentes que nos axuden a seguir avanzando cara a esta meta”.

Vilagarcía de Arousa, 14 de maio de 2018,