facebook

 

 twitter

 

 youtube

 

 linkedin

   
Martes, 13-Abril-2021
Español (spanish formal Internacional)Galician (Galego)English (United Kingdom)
Mapa web
Autoridade Portuaria e Concello de Vilagarcía acordan crear unha comisión técnica para avanzar en temas urbanísticos
Venres, 19 Febreiro 2021 09:51
AddThis Social Bookmark Button

reunion1O presidente da Autoridade Portuaria de Vilagarcía, José Manuel Cores Tourís, mantivo esta mañá unha reunión co alcalde de Vilagarcía, Alberto Varela, e a concelleira de Urbanismo, Paola María, na sede da Autoridade Portuaria.

A reunión, que dá continuidade á visita institucional realizada polo presidente da Autoridade Portuaria ao Concello o pasado mes de decembro, serviu para determinar a fórmula pola cal as dúas administracións traballarán a partir de agora para avanzar na resolución de diversas cuestións de índole urbanístico pendentes.

A principal conclusión da reunión é que Concello e Autoridade Portuaria crearán unha comisión técnica, con dous membros por cada unha das partes, que analizará pormenorizadamente os asuntos pendentes co obxectivo de determinar a solución técnica máis conveniente en cada caso. A previsión é que a primeira reunión entre as partes se produza este mesmo mes.

Unha das prioridades da Autoridade Portuaria é a realización de cambios no PXOM para axustar á realidade física do dominio público portuario -e ao recolleito na Delimitación de Espazos e Usos Portuarios ( DEUP)- a área delimitada como tal no plan municipal. Esta modificación debe realizarse con carácter previo a que o porto poida modificar o seu propio Plan Especial para incorporar ao mesmo os terreos xerados coas ampliacións dos peiraos de Ferrazo e Comercial. Os técnicos analizarán se –tal e como sostén a Autoridade Portuaria- é posible introducir estes cambios no PXOM pola vía da modificación puntual, o cal aceleraría a súa materialización.

Deste trámite depende, de maneira indirecta, a incorporación do Ramal aos espazos portuarios abertos ao uso público, un obxectivo que comparten Autoridade Portuaria e Concello, e que tamén será tratado pola comisión técnica. E é que as naves do Ramal ofrecen actualmente ao porto unha importante capacidade de almacenamento, co cal é necesario poder dotarse dunha alternativa noutros terreos portuarios antes de poder proceder á súa eliminación; e a creación desta alternativa está subordinada á xa mencionada modificación do Plan Especial do porto.

Este grupo de traballo técnico tamén abordará a incorporación ao Plan Xeral de Ordenación Municipal da parcela da Concha-O Ramal situada entre a praia e o parque de Miguel Hernández e que é propiedade da Autoridade Portuaria, e para a cal a Autoridade Portuaria solicitou que se manteñan no PXOM os usos que xa tiña cando estaba incluída no dominio público portuario.

Finalmente, a comisión tamén tratará a situación do edificio e a parcela da antiga Comandancia de Mariña, un inmoble de titularidade portuaria no que actualmente se sitúa a sede do Clúster da Función Loxística de Galicia e un centro de emprendemento vinculado ao sector marítimo-portuario, e que por parte do Concello se considera un emprazamento idóneo para a creación dun Centro de Saúde.

Porto de Vilagarcía, 18 de febreiro de 2021.

 

Las cookies nos permiten ofrecer nuestros servicios. Al utilizar nuestros servicios, aceptas el uso que hacemos de las cookies Puede obtener más información, o bien conocer cómo cambiar la configuración, en nuestra política de privacidad.

Acepto las cookies.