facebook

 

 twitter

 

 youtube

 

 linkedin

   
Sábado, 23-Marzo-2019
Español (spanish formal Internacional)Galician (Galego)English (United Kingdom)
Mapa web
A presidenta da Autoridade Portuaria, Sagrario Franco, entrevistouse co alcalde de Vilagarcía
Venres, 09 Setembro 2011 01:00
AddThis Social Bookmark Button

A presidenta da Autoridade Portuaria de Vilagarcía, Sagrario Franco Malvar, reuniuse esta mañá no Concello de Vilagarcía co alcalde, Tomás Fole, e a concelleira de Relacións Institucionais, Marta Rodríguez, nun encontro concibido como unha primeira toma de contacto, na que as dúas partes puxeron de manifesto o consenso existente en relación con iniciativas que requiren a súa colaboración para o desenvolvemento económico e social de Vilagarcía.



Dous foron os temas principais que se trataron na reunión: o proxecto de integración Porto-Cidade, dentro do cal se inclúe unha importante actuación de apertura á cidade de zonas do dominio público portuario, e a integración de O Ramal no tecido urbano de Vilagarcía. Tanto a presidenta como o alcalde destacaron que son dous proxectos estreitamente relacionados, xa que a extensión do ferrocarril aos peiraos da zona sur do porto, que á súa vez inclúe a reforma urbana da rúa Valle Inclán, é unha actuación imprescindible para, con posterioridade, poder acometer a liberación do peirao de O Ramal de usos comerciais e industriais a fin de poder dedicar ese espazo a usos cidadáns. A presidenta da Autoridade Portuaria e o alcalde coincidiron na conveniencia de traballar a prol dun amplo consenso á hora de determinar cales serán os futuros usos do peirao.

Sagrario Franco lembrou que a execución das obras de extensión do ramal ferroviario á zona sur do porto será fundamental para a configuración dun Porto no que as zonas comerciais e industriais estean concentradas na parte máis afastada á cidade, mentres que as zonas próximas ao centro urbano se dedicarán a usos cidadáns, relacionados coa náutica deportiva e o tráfico de pasaxeiros. Neste sentido, a presidenta anunciou que a primeira fase destas obras, que comprende o tramo comprendido entre a entrada ao peirao de O Ramal e o de Comboa, sairá a licitación este ano e os traballos comezarán en 2012. O orzamento destes traballos -que contan con financiamento a cargo de fondos de cohesión da Unión Europea- ascende a 5,8 millóns de euros.

Outro dos temas abordados neste encontro foi a promoción do tráfico de pasaxeiros. Neste sentido Sagrario Franco destacou a importancia de traballar en colaboración co Concello para que Vilagarcía incremente o seu atractivo para os cruceristas, o que repercutirá na dinamización da cidade.

Finalmente, o alcalde apuntou á posibilidade de negociar coa Autoridade Portuaria a posta a disposición da cidade de zonas de aparcadoiro situadas dentro do dominio público portuario, cuestión que será abordada en próximas reunións.