O presidente da Autoridade Portuaria e a presidenta do Consello Regulador do Mexillón de Galicia manteñen a súa primeira reunión
O presidente da Autoridade Portuaria de Vilagarcía, José Manuel Cores Tourís, mantivo este mércores un encontro coa presidenta do Consello Regulador da Denominación de Orixe Protexida Mexillón de Galicia, Lina Solla.
O presidente da Autoridade Portuaria de Vilagarcía, José Manuel Cores Tourís, mantivo este mércores un encontro coa presidenta do Consello Regulador da Denominación de Orixe Protexida Mexillón de Galicia, Lina Solla.
A presidenta, que accedeu a este cargo en novembro de 2020, e Cores Tourís –o cal tamén foi nomeado presidente da Autoridade Portuaria de Vilagarcía a finais do pasado ano- celebraron unha reunión de carácter institucional, na que se puxo de manifesto a importancia da colaboración e o bo entendemento entre a Autoridade Portuaria e o Consello Regulador, organismo que ten a súa sede en terreos da Autoridade Portuaria de Vilagarcía.
A presidenta do Consello Regulador da Denominación de Orixe Protexida Mexillón de Galicia expuxo a Cores Tourís a situación do sector e da DOP; e que afronta esta etapa con metas como a consolidación do Consello Regulador como casa común de todos os operadores do sector do mexillón en Galicia, o fortalecemento da notoriedade e prestixio da DOP nos mercados, o recoñecemento público e institucional do cultivo do mexillón en Galicia como actividade sostible ou a mellora da competitividade para todos os operadores.
Pola súa banda, Cores Tourís felicitou á presidenta do Consello Regulador polo reforzo da imaxe internacional do mexillón de Galicia que supón a autorización –dada a coñecer esta mesma semana- para que os produtos elaborados con Mexillón de Galicia, mesmo cando fosen sometidos a un tratamento tecnolóxico ou de conserva, poidan utilizar o símbolo comunitario nas súas etiquetas xunto ao selo propio da DOP, como xa ocorre co produto fresco. O presidente portuario puxo en valor o labor que desenvolve o Consello Regulador do Mexillón de Galicia como organismo que traballa para fomentar a calidade do mexillón, así como para a promoción de iniciativas socioeconómicas para a mellora do tecido produtivo vinculado ao mesmo.
Cores Tourís tamén mencionou o gran peso que o sector mexilloeiro, en todas as súas facetas, ten en toda Galicia pero, moi particularmente, na Ría de Arousa. O presidente tamén puxo ao dispor de todas as empresas que forman parte da DOP o porto de Vilagarcía como plataforma loxística para o seu acceso a mercados exteriores.
Porto de Vilagarcía, 14 de xaneiro de 2021.
O Porto de Vilagarcía mantén a súa operatividade e implementa medidas de apoio á comunidade portuaria
O Porto de Vilagarcía mantén a súa operatividade ao servizo da cidadanía e de toda a sociedade. Os portos de Interese Xeral do Estado son infraestruturas estratéxicas garantes do funcionamento de servizos que se definen como esenciais.
O Porto de Vilagarcía rexistra en 2019 o mellor balance de tráficos da súa historia, cun incremento do 8,9% con relación ao ano anterior
A Autoridade Portuaria de Vilagarcía pechou o exercicio 2019 co mellor balance de tráficos da súa historia, establecendo un novo máximo anual de movemento de mercadorías.
Aceites Abril proxecta ampliar o seu centro loxístico no porto de Vilagarcía, aumentando a súa capacidade actual nun 75%
A empresa aceiteira galega Aceites Abril proxecta reforzar a súa presenza no porto de Vilagarcía a través dunha ampliación das súas actuais instalacións, nas que se sitúa un centro loxístico de recepción, almacenamento e distribución de aceite.