A Autoridade Portuaria pecha o ano 2021 cun récord histórico: máis de 1,5 millóns de toneladas movidas e un incremento do 25%

A Autoridade Portuaria de Vilagarcía acaba de pechar o exercicio 2021 cun récord histórico de tráficos portuarios. Estes alcanzaron a cifra de 1.511.356 toneladas, case 200.000 toneladas por encima do anterior récord, establecido en 2019. Desta maneira, cúmprense as excelentes expectativas para o peche do exercicio ás que viñan apuntando todas as cifras desde o comezo do ano. Cabe destacar que desde o pasado xaneiro viñéronse superando mensualmente todos os rexistros, tanto nos tráficos acumulados como no comparativa mes a mes, do ano 2020. O incremento porcentual dos tráficos contabilizados en 2021 con relación a 2020 é do 25%. 

Unha das cifras máis destacadas da estatística é o movemento de mercadoría xeral, que superou as 800.000 toneladas, case 150.000 toneladas máis que o anterior máximo anual nesta categoría de tráficos portuarios, establecido o pasado ano. Neste apartado, dúas mercadorías moi importantes polos seus volumes no porto de Vilagarcía, como son o taboleiro e o aluminio, establecen novos récord a peche do exercicio. Pola súa banda os contedores conseguen compensar a peche do ano parte do descenso acumulado en meses anteriores, alcanzando no acumulado anual un total de 33.986 TEUS. En toneladas, o movemento de contedores achegou case 300.000 ao balance de tráficos portuarios do ano. O incremento porcentual na categoría de mercadoría xeral con relación ao pasado ano foi do 22,4%. 

Na categoría de graneis sólidos, aínda que non se establece un máximo anual, si se melloran amplamente as cifras do pasado ano, cunha subida do 35,7%, achegando 425.965 toneladas ao balance anual de tráficos portuarios. Un dato salientable é que todos os produtos incluídos nesta categoría ven incrementados os seus rexistros con relación ao exercicio inmediatamente anterior. A subida máis destacada corresponde ao cuarzo, que cun incremento porcentual do 52,9%, supera as 144.000 toneladas, o que supón un novo récord anual para este produto no porto de Vilagarcía. O segundo produto por número de toneladas movidas nesta categoría é a urea, da que se contabilizan 109.550 toneladas. Pola súa banda o cemento, con case 78.500 toneladas movidas, marca os seus mellores datos da última década. 

No apartado de graneis líquidos, o total anual sitúase nas 273.562 toneladas, o mellor resultado nesta categoría desde o ano 2008. O incremento porcentual con relación ao ano anterior é do 17,2%. Nesta categoría destacan as cifras do aceite, que por primeira vez desde a entrada en funcionamento da terminal de Aceites Abril no noso porto, consegue superar a cifra de 100.000 toneladas descargadas nun ano. A parafina, que achega 19.500 toneladas a esta estatística, tamén marca as mellores cifras da súa historia, mentres que o metanol establece o seu mellor rexistro desde o ano 2014. 

Ás cifras asociadas ao movemento dos diferentes tipos de mercadoría hai que engadirlle as correspondentes ao avituallamento, que achega 7.752 toneladas, un 47,5% máis que no ano anterior, e a cifra máis alta dos últimos 10 anos. 

En canto ao tráfico de cruceiros, o exercicio pechouse con catro escalas, todas elas en outubro, e un total de 2.876 persoas que desembarcaron no porto de Vilagarcía, das cales 1.166 foron pasaxeiros, e a cantidade restante, tripulación. A chegada de cruceiros neste exercicio supuxo a reactivación dun tráfico que o pasado ano non chegou a rexistrar ningunha escala no noso porto, debido ás restricións asociadas á pandemia do COVID-19. 

O presidente da Autoridade Portuaria, José Manuel Cores Tourís, destacou que “establecemos máximos anuais en cinco mercadorías (entre as cales están representadas os tres grupos de tráficos portuarios) e tamén se conseguiu superar a cifra de 75.000 toneladas movidas nun total de nove produtos: ademais do aluminio, o taboleiro, o cuarzo, e o aceite -todos eles en récord anual- tamén se supera esta cifra no movemento de contedores, urea, cereal, cemento e metanol. Foi, pois, un ano o que obtivemos grandes resultados, grazas ao compromiso e esforzo de toda a nosa comunidade portuaria cara á consolidación de tráficos, e tamén, por suposto, á confianza e competitividade das empresas que utilizan o noso porto como nodo loxístico para os seus intercambios comerciais. A todos eles, gustaríame agradecer a súa confianza e por suposto, recoñecer a dedicación de todo o persoal da Autoridade Portuaria, un organismo que conta cun equipo profesional moi competente e enfocado na plena satisfacción dos nosos clientes como prioridade no seu labor”.

Porto de Vilagarcía, 10 de xaneiro de 2022.